Hví havi eg valt
hesa yrkisleið?

Eg eri kanska í einum minniluta, tá ið eg sigi so – eg elski lýsingar.

Men eg elski eisini mál. Og lýsingatekstir eru teir sjónligastu tekstirnir í almenna rúminum, og av tí sama hava teir stóra ávirkan á tað føroyska málið. Sum málfrøðingur og teksthøvundur síggi eg tað tí sum mína evstu ábyrgd at tryggja, at málburðurin er góður, og at innihaldið er viðkomandi.

Blaða niður og les víðari um meg, míni áhugamál, aðalmál, endamál – ja, okay, mál er ein nokk so afturvendandi táttur í tí heila.

Tað stutta av tí langa

Útbúgving

Eg havi eina MA í føroyskum máli og bókmentum frá Føroyamálsdeildini umframt eina B.Ed. frá Læraraskúlanum.

Servitan

Eg havi skrivað MA-ritgerð um, hvussu sosialir miðlar skapa nýggjar treytir fyri føroyskar fyritøkur, tá ið tær marknaðarføra seg á føroyskum máli.

Royndir

Eg havi nærum eitt áratíggju av royndum sum teksthøvundur, har eg havi hjálpt føroyskum fyritøkum at finna sína rødd og sítt pláss á marknaðinum.

Áhugamál

Arbeiði og frítíð renna eitt sindur saman hjá mær. Eg skrivi lýsingatekstir um dagin og yrkingar um kvøldið.

Tungumál

Umframt móðurmálið skrivi og tosi eg flótandi danskt og enskt, og so dugi eg á samrøðustøði fitt av norskum og sponskum.

  • Hví havi eg stovnað Blablabla?

    Navnið sipar til einkisigandi lýsingar, click-bait yvirskriftir og aðrar lítlar tíðartjóvar, sum stjala okkara uppmerksemi uttan at geva okkum nakað afturfyri.

    Eg havi verið í vinnuni nóg leingi til at sæð, at okkurt er galið, men ikki nóg leingi til einki at gera við tað. Og her tosi eg ikki um stavivillur, men um lýsingar yvirhøvur. Í dag er annarhvør føroyingur bundin av sosialum miðlum og fartelefonini, og tað eru lýsingarnar, sum fáa sosialar miðlar at mala runt fíggjarliga. Tað nítur mær í hjartað at síggja fólk á matstovum og í bussum sitandi í tøgn, saman, men hvør sær, sogin niður í hvíta ljósið, blind og blendað av fullkomiliga einkisigandi upplýsingum – vitandi, at mítt yrki kanska er partur av orsøkini til henda óhugnaliga nýggja veruleika.

    Við mínum penni fari eg at geva mítt íkast til, at lýsingar og tekstir í almenna rúminum ikki spilla tíðina hjá fólki.

    Hvussu? Við burðardyggum lýsingum. Jeps. Tað er eitt ting. Burðardyggar lýsingar eru ein av súlunum hjá mær og hava serlig atlit at meiningsfullum og viðkomandi innihaldi. Hví? Tí internetið dálkar nú meira enn øll flogvinnan til samans, har ið lýsingar standa fyri 10 % av øllum CO2-útlátinum.

    Og nú fari eg at tosa í boðshátti: Ikki hugsavna teg um stuttskygda sølu, men heldur um varandi sambond. Legg dent á gjøgnumskygni og ærligheit. Miða eftir at byggja upp eitt gott trúvirði. Brúka tíð upp á ein viðkomandi boðskap, sum røkkur út til tey røttu fólkini, heldur enn pengar og orku uppá at rópa harðast. Eitt ramligt slagorð kostar pengar, men tú kanst draga gagn úr tí í fleiri áratíggju.

    Aftur í 1. persón. Tá ið eg las føroyskt á Føroyamálsdeildini, skrivaði eg MA-ritgerð um marknaðarføring á føroyskum og bar fram spurningarnar: Ávirka lýsingar føroyska málið? Ávirkar málið lýsingarnar? (Svarið var ja og ja.) Tá ið vit fingu sosialar miðlar, broyttust treytirnar fyri marknaðarføring yvir nátt, tí nú kundu fyritøkur lætt og skjótt og ikki minst ókeypis røkka út til viðskiftafólkini – uttan um lýsingastovurnar. Nú, eftir meira enn eitt áratíggju við memes og dáma-og-deil-kappingum, framleiða tær flestu fyritøkurnar sítt egna lýsingatilfar við ymiskum forritum og vitlíkisfunkum. Lýsingarnar bara vaksa í vavi, men góðskan … viknar. Granskingin hjá mær vísti, at fyritøkur hava ikki ein málsligan samleika, tær tillaga seg ikki umstøðurnar á sosialum miðlum og leggja ikki upp til tvívegis samskifti.

    Við Blablabla fari eg at geva mítt íkast til føroysku lýsingavinnuna. Eg vil lyfta føroyskar lýsingar, sum eru farnar at fylla so nógv í okkara gerandisdegi, upp á eitt hægri støði. Blablabla er samskifti, sum gevur meining, og sum ríkar – um ikki tilveruna – so løtuna.

Hvørjum kann eg hjálpa tær við?

Sí allar tænastur

Tú sigur bara til

Við einum teksthøvundi á síðulinjuni fert tú at framstanda sum serfrøðingur á tínum øki. Tey røttu viðskiftafólkini fara at tekkjast tær og fáa tokka til tínar vørur og tænastur. Ikki bara tí tú ert kappingarførari enn onnur. Men tí tey kenna seg aftur í tínum samskifti. Tey síggja, at tit hava okkurt í felag.

Send mær eini boð og lýs í stuttum, hvørjar avbjóðingar ella dreymar tú hevur. So finna vit ein dag at práta um tað.